Психотерапија и советување за депресија и анксиозност
Заглавени сте во песимистично размислување без да можете да го видите излезот од таму? Се чувствувате безнадежно, безпомошно, безвредно или немате мотивација да промените нешто во вашиот живот?
Ако се соочувате со:
• емоции кои ја потискаат вашата самодоверба
• ниско ниво на енергија и покрај долгото спиење
• збунетост во вашите размислувања
• високо ниво на самокритика
• неспособност да се релаксирате физички и психички
• не верувате дека се ќе биде во ред
• чувствувате дека не сте „доволно добри“
• ви недостасува радост, забава и задоволство
• се чувствувате очајно секој ден
• лесно се фрустрирате и иритирате
• се околу вас „ве вади од кожа“
Можеби се соочувате со депресија, со силни чувства на тага кои предизвикуваат да се повлекувате од секојдневните активности и социјалниот живот. Можеби сте силно вознемирени, чувствувате страв, премногу се двоумите за своите постапки и се чувствувате неспособни да донесете ефективни решенија за вас и вашиот живот. Доколку сте се обиделе да одржите одредено ниво на расположение, но тоа не трае долго, можеби ви е потребна професионална помош.
Одложувањето на барање помош за психичките потешкотии кои ги доживувате, постепено може да почне да влијае на вашите релации со другите луѓе, работата и физичкото здравје.
Можеби во овој момент не можете ни да замислите дека вашиот живот може да тргне на подобро или имате некоја визија за вашиот живот, но не верувате дека можете да ја постигнете. Идејата да разговарате со психотерапевт за да ги разјасните вашите емоции и блокади, може да ја доживувате малку вознемирувачки бидејќи треба да зборувате пред некој кој ви е непознат. Сепак, психотерапевтот е тука за вас и го поддржува вашето темпо, ги почитува вашите граници и она што сакате или не сакае да го споделите со него. Заеднички ќе пронаоѓате начини со кои ќе ги совладувате вашите животни предизвици.
Вашиот живот не мора да биде тешка борба со сам себе, можете да си помогнете психотерапијата и да за почнете да гледате посветла иднина и да се чувствувате многу повеќе компетентни и адекватни.
Анксиозноста и депресијата многу ретко се појавуваат изолирани една од друга. Често пати луѓето ги имаат симтомите од двете состојби.
Што е депресија?
Чувството на тага е нормална реакција на некоја загуба или предизвикана душевна болка. Меѓутоа, кога тагата ја преплавува личноста и опстојува многу долг период, може да го доведе животот во целосен застој и дисфункционалност. Борбата со симптомите на депресија може да ја исцеди животната енергија и прави да се чувствуваме тажни, безнадежни и сами.
Секој од нас во даден момент од животот почувствувал потешкотии. Многу од нас се почувствувале заглавени, депресивни и анксиозни. Понекогаш болката со која се соочуваме е премногу голема за да може да се справиме со неа. Сепак, кога чувствата на интензивна тага, безнадежност и безвредност траат со месеци, многу е веројатно дека се соочуваме со повеќе од обична тага.
Знаците на депресија вклучуваат:
• потешкотии да се сконцентрирате, да запамтите детали и да донесувате одлуки
• премор и намалено ниво на енергија
• чувства на вина, безвредност и безпомошност
• чувства на безнадежност и/или песимизам
• несоница или претерано спиење
• иритабилност и неспокој
• изгубен интерес во активности кои ви носат задоволство, вклучувајќи и секс
• чувство како да нема причина за живеење
• прејадување или губење на апетит
• хронични болки, главоболки, грчеви и дигестивни проблеми
• постојана тага, вознемиреност и чувство на празнина
• мисли за самоубиство, обид за самоубиство
Најчесто овие симптоми се доживуваат како чувство кога се наоѓаме на непознат пат среде густа магла. Чувствата во однос на себе, пријателите, семејството, животот и иднината најчесто се негативни и болни. Тие чувства се преплавувачки предизвикуваат силна безнадежност, разочарување, незаинтересираност за се што се случува во околината.
Депресијата може да биде предизвикана од силен животен настан како што е загуба или некоја повреда, раѓање на дете или пак многу посуптилни ситуации како што е присетување на претходно потиснати болни сеќавања, крупни и нагли животни промени и сл. Депресијата може да доведе до изолација, социјални конфликти, злоупотреба на алкохол, лекови и дрога, како и физички здравствени проблеми.
Депресијата најчесто се јавува поради следниве животни ситуации:
• смрт на некоја блиска личност
• раскинување на врска
• развод на брак
• губење на работно место
• иселување на децата
• голема животна промена
Во текот на терапискиот процес се работи на полесно и целосно разбирање на изворот на депресивните чувства. Заедно со психотерапевтот ќе ги согледате нештата во вашиот живот кои можете или не можете да ги контролирате, а постепено ќе почнете да градите способности за решавање на проблемите.
Што е анксиозност?
Она што ни предизвикува страв, го доживуваме како опасност или се чувствуваме нервозни, несигурни и загрижени околу очекувањето дека нешто може да тргне наопаку со еден збор може да се нарече анксиозност.
Секој од нас во одреден момент од животот чувствува анксиозност. Тоа може да се случи поради чувствата дека немаме контрола над ситуацијата, кога мора да донесеме важна одлука, да направиме големи промени во нашиот живот, мора да се предсатавиме себе си на поинаков начин или кога сме доживеале некакво трауматско искуство.
Личноста која страда од анксиозност има постојано „предчувство“ дека нешто лошо ќе се случи. Анксиозноста создава силна вознемиреност која обично не може да се контролира со вообичаените обиди за смирување.
Во случај кога анксиозноста станува многу силна и сериозна, може да доведе до панични напади кои се карактеризираат со силен и изненаден страв, срцеви палпитации, потење, вртоглавици, ужасен страв од умирање и тн. Многу нешта можат да бидат причина за анксиозност која бара психотераписки третман, а тоа вклучува и трауматско искуство, злоупотреба и други сериозни медицински состојби.
Симптомите на анксиозност вклучуваат:
• постојано повторување на исти мисли кои предвидуваат „катастрофи“
• пренагласени стравови
• неспособност за спиење бидејќи мозокот не сака да се исклучи
• проблеми со дигестивниот систем
• панични напади
Анксиозноста може да го окупира животот на личноста и да ја онеспособи да ги извршува активностите кои претходно ги вршела, искуствата кои носеле задоволство веќе не се интересни затоа што загриженоста за иднината или опседнатоста со минатите искуства се прелева на секој аспект од животот.
Како психотерапијата и советувањето можат да ви помогнат?
Во текот на психотерапијата психотерапевтот се насочува кон поврзување на клиентот со неговата сопствена сила, енергија, радост и надеж. Клиентот и психотерапевтот заедно работат на откривање на причините за анксиозноста, на постепено зајакнување на чувството на исполнетост и учење на ефективни начини за пристапување кон иднината. Клиентот ќе научи како да се справува со сопствените негативни мисли, ќе научи техники и методи кои ќе му овозможат многу полесно да се справува со анксиозноста и депресијата. Тераписката сеанса е место каде клиентот ќе може да ги изрази сопствените чувства без да се плаши дека ќе биде осуден и критикуван за она што го чувствува.
Нештата не може да се подобрат со „чекање да помине“. Доколку се соочувате со депресија и анксиозност треба да знаете дека не сте слаба личност. Може да побарате помош и заедно да се фокусираме на вашата флексибилност, надеж и потрага на смислата на вашиот живот. Како ваш терапевт, ќе бидам активен учесник во креирање на вашите промени. Со моја помош може да ги надминете анксиозноста и депресијата и да создадете спокоен живот.
